天氣已經凍左好多日，最啱食番餐熱辣辣，今日與友人相約到大煲皇煮廚食海鮮! 可以選擇打邊爐或者蒸氣石鍋，既然想食海鮮的我們，當然選了後者。
蒸氣石鍋海鮮餐共可選擇３款粥底，包括南瓜排骨粥、瑤柱鮮淮山粥和健康五穀雜粮粥。而海鮮除了各種貝類和美國龍蝦，可自選５款海鮮，再任選其他配料。
落左單，侍應很快送上前菜 – 炸三文魚骨香脆可口，炸好後的三文魚骨撒了點椒鹽，所以咸香可口，我一連食了好多件。
友人不想食活魚刺身，可以轉例牌燒鵝，一上枱，已經聞到好香，燒鵝皮色澤金黃、皮脆肉嫩
，不會過咸，沾點酸甜醬滋味非常。
首先上枱的海鮮是龍蝦和貝類，可以用同一個時間蒸，所以可以一齊落鍋，咁就可以不停蒸不停食，唔使望住等到頸都長。哈哈。
龍蝦超厚肉，仲有好多膏，真係望到都流晒口水呀！
肉質鮮味彈牙，就算唔沾醬汁都好夠味，反而沾點膏一起食，鮮味更突出。我同友人都食到舔舔脷！貝類雖然都幾厚肉，但就相對普通，不過都無沙同鮮味。
日本元貝真係超大粒呀，大過個拳頭呀，元貝肉吸收左炸蒜的香，再加上本身的鮮，超級好味，仲要啖啖肉，好滿足。群邊都好好味，彈牙爽口，粉絲吸收晒兩者既味，更加滋味。
象拔蚌雖然細隻Ｄ，但都好厚肉，夾埋粉絲炸蒜一齊食，好味！而鮑魚可能蒸耐左，比較韌。
肉蟹真係好厚肉，仲好多膏添！肉質鮮彈，夾埋膏一齊食，好邪惡但好滋味。下面仲有Ｄ撈左炸蒜的糯米，吸收左肉蟹的鮮味和蟹膏的香味，食得好滿足，冬天食仲好暖胃添！
另外仲叫左蟲草雞，好滋補。雞肉都好滑，而且食左咁多次蒸鍋，真係第一次食蒸烏冬，又幾好味喎！
肥牛片都好味！不過唔太鐘意肥既我就稍嫌蒸既方法去油唔夠啦。
最後食埋個瑤柱鮮淮山粥！頭先食過既咁多款海鮮的鮮，再加埋瑤柱的咸鮮，個粥真係無得頂，明明已經好飽，但都忍唔住食左兩碗！
