覓食到太子，呢晚食串燒！
搵到柏樹街呢間串燒店，一於試下
串燒似乎多人當宵夜，所以晚餐可以食好抵嘅酸辣粉，選擇多多
餐單設計簡約，呢區嘅居民仲可以嗌外賣！
餐牌最後一版係小食同嘢飲，咩嘢食都未嗌就即刻點咗個椰青解渴～
串燒選擇都唔少，分晒類，容易搵到想食嘅嘢～
椰青，$32
清甜解渴，食泰國菜必點！
每次飲嘅時候都會好有心機咁挖晒啲果肉來食，正！
海鹽燒盲曹，$118
超級驚喜！
上枱嗰一刻已經好震撼，成條魚上
面嘅魚皮上枱嘅時候切好咗，一揭即開，食到熱辣辣嘅魚肉
本來對個味道無乜特別期待，食咗一啖簡直驚為天人！
肉質鮮嫩滑溜，燒之前應該用海鹽醃過條魚，所以魚皮上仲見到好多粒海鹽
就係因為咁，海鹽嘅味道滲咗入啲魚肉度
鹹味可以為魚肉再增添鮮味，唔點醬都得
但係鍾意混醬嘅我，一定要點～醬汁酸酸辣辣，非常惹味～～
泰式白鳳爪，$58
白鳳爪已經去骨，爽脆可口
配菜有大量芹菜，生菜，紅蘿蔔，但完全唔會有青味
調味同樣係酸酸辣辣，食得好過癮
燒茄子，$30
食親燒烤嘢都鍾意嗌茄子，因為茄子烤完之後可以一絲絲咁食，好得意
調味好實在，如圖中所見，茄子上面鋪咗好多好多嘅蒜同蔥
仲有少少辣椒，味道濃郁，睇返相都流晒口水
雞軟骨，$12（兩串起）
香蜜雞中翼，$15／2隻
雞軟骨瞬間嗦嗦嗦咁就食晒
香蜜雞中翼嘅調味一流，鹹中帶辣
雞翼面燒得少少焦香，裏面依然嫩滑多汁
芝士雞蛋大啡菇，$38
造型滿分！
用融化嘅芝士封住啡菇嘅底
最玄妙嘅係，芝士同菇中間嘅空間原來埋咗隻蛋
質感好新奇，味道都唔錯～
