叫了兩個套餐，勝瓜鹹蛋浸肉片，菠蘿京都骨，每個$43，包例湯、白飯同飲品。
先黎例湯，係清補涼煲豬肉，凈係睇都覺得幾好味，飲落果然幾好，幾足火候。然後兩個餸雖然都幾好味，但係份量就幾少，好似幾唔抵。勝瓜鹹蛋浸肉片比想像中多湯，得一只鹹蛋黃，蛋白好少好稀，肉片份量普通，感覺太水汪汪；菠蘿京都骨我食個幾件都少肉，有肉既唔多。白飯睇落好靚，所以特登影相，點知最唔掂係佢，鬆散無飯味。
飲品叫左奶茶同好立克。奶茶落奶好重手，頂唔順倒左三分一杯，再請夥計幫我加茶，跟住就飲得出茶味啦，又幾好wo。
返屋企睇下，最近一篇食評竟然係舊年九月，差不多一年無人寫佢D食評！其實佢D野都OK，可以加多少少份量就會好D。
