搭左成個鐘巴士到尖沙咀，但因為餐廳地點唔就腳，去到附近都要搵左一陣先到門口。
一入門口，侍應一貫地大聲歡迎客人 ( 日文聽唔明
)
而因為今日做團購價惠只賣裡豚王，所以全部人都係食同一種味道既拉麵。
坐到位置後，侍應會俾張大紙巾客人，以免客人用餐時湯汁彈到身上，亦有問長髮既女士需唔需要橡筋紮起頭髮，呢方面感覺上都幾貼心。
好快拉麵上檯
聽到隔離檯客人問呢碗係邊種味道，先知原來呢款咁神秘既味道，係用元貝做湯底，但食落依然有豬骨湯底既味道，估計係兩者混合。
起筷後，一開始即食既紫菜已經變腍，無脆口感覺，呢方面要改善。
伴菜既筍，只係能夠用「重口味」黎形容，超級入味，但就較鹹。
半熟蛋做得剛剛好，仍有糖心蛋黃，只係略嫌蛋味不夠，比上次食原隻時差少少。
拉麵方面，雖然做到掛湯，但味道、咬口好似一般，可能麵質唔太岩口味。
叉燒就同平時分店食的無大分別，可能食過日本其他拉麵舖果種入口即溶既感覺，所以香港版既叉燒既唔太喜歡，同埋偏瘦，要多咀嚼兩下先得。
至於拉麵最精髓既湯底，元貝味其實唔突出，要差唔多食到底時先覺得有元貝味，所以起初覺得湯底只係普通的豬骨湯底，可能要開始時搞多幾下等味道平均分佈。而貫徹拉麵慣常作風，湯底都係無加味精，飲完一整碗都未有口渴，值得一讚！
總括幾次經驗而言，豚王整體可以做到日本果種既感覺，但始終有用料唔係日本貨，所以唔可能百份百做出原味，要好食既都係要去日本品嚐，香港泡製的拉麵只可以用作止心癮。如果未去過日本食拉麵，其實豚王係香港黎講已經做到好頂級，最少比香港一風堂落味精好幾級。
