首先講吓美國牛柳粒， 師傅即場喺鐵板燒到滋滋聲，未食已經流口水！牛柳粒切到一口size，外面煎到微脆，入面保持到粉嫩色澤，咬落去肉汁爆發，仲有淡淡炭香。最正係佢哋個秘製燒汁，帶少少甜味，同牛肉嘅油脂香超夾，令人食到停唔到口！
至於鵝肝多士真係邪惡到極點！鵝肝煎到外層香脆，內裡入口即化，個種豐腴嘅油脂香真係令人難以抗拒。底下嘅多士烘得脆卜卜，仲塗咗層薄薄嘅蜜糖，完美平衡咗鵝肝嘅膩感。雖然罪惡感滿分，但真係值得啊！
食物質素絕對收貨！師傅手勢唔錯，價錢又合理，兩個人埋單都係五百零蚊，喺旺角嚟講性價比幾高。如果想平平地食個鐵板燒過吓口癮，呢度絕對係唔錯嘅選擇～
