餐廳位處於空中花園，設有室內亦有室外座位，天氣唔太熱的話，室外都幾受歡迎。
蟲二主打中日家庭料理，其中一汁三菜便當可以話係佢哋嘅signature之一，我哋就選擇咗清酒醬燒鰻魚，擺盤非常精緻。
每款食物都附有一張建議食法咭，真係體貼又細心。
首先將一半鰹魚昆布茶漬湯倒入日本穀米杞子醬油炊飯。
然後茶漬飯就可以配以清酒醬燒鰻魚一併享用。
食咗一半茶漬飯之後，就可以混入63C慢煮蛋，令茶漬飯變得更加Creamy。
漬物係豆腐同野菌，亦可以混入茶漬飯一齊食。估唔到一份午餐都可以咁講究，食起上嚟都份外優雅。
食完主食當然要食甜品，而蟲二係以pancake起家，當然要試吓其中一款。桂花麻糬傳統班戟伴以一大球雪糕，厚厚嘅班戟之內仲藏有軟糯嘅麻糬，令口感更加豐富。
班戟當然同樣配有說明書。不過我就選擇咗用自己嘅方法去品嚐，因為好味嘅甜品點食都係咁正！
點餐後仲可以優惠價嘆飲品，洛神花水果茶酸酸味味又清甜，加入提子同薄荷葉就更清新。
Baileys Choco就有淡淡的酒香，Baileys配朱古力真係冇得彈。
