炑八韓烤 (瓊華中心) (Closed)

最近旺角炑八燒烤推出咗放題，吸引咗唔少食客慕名而來。今次我哋揀咗中價位嘅匠心燒肉放題套餐，入面竟然已經有韓牛，真係超抵食！🤩牛肉佢哋呢個餐有提供韓牛，真係完全超出預期！肉質鮮嫩，油脂分佈均勻，入口即溶，絕對可以滿足到肉食獸嘅胃口！🤤 另外，其他肉類嘅選擇都唔少，例如豬肉、雞肉等等，而且醃製得宜，味道香濃，唔會太鹹，我自己最鍾情厚切五花腩，真係令人非常滿足。除了肉類之外，海鮮嘅選擇都唔少，包括有蠔、紅蝦同八爪魚等等，全部都好新鮮，而且處理得乾淨，仲經已調好味，一整盤錫紙兜拎去燒就可以，非常方便。😋 除咗燒肉之外佢哋仲提供多款韓式料理，當然點少得炸雞，佢哋嘅炸雞係無骨炸雞，食落啖啖肉，味道仲有5款可以揀，我哋最鍾意甜辣，夠傳統韓式味道之外，仲帶點惹味。水冷麵係必點嘅菜式之一，涼浸浸嘅水冷麵，一定係食燒肉嘅時候必要之選，佢哋嘅份量唔多，加上麵條爽彈，食完真係透心涼。放題仲包括任飲嘅汽水、果汁等等，選擇都算多。甜品方面，有4款口味嘅雪糕都唔錯。佢哋仲有提供Asahi Sour，呢款係單點特飲，但現時有優惠買一送一，我哋揀咗蜜桃味同紅番石榴，兩者味道都香甜，可以覆過酒精嘅苦澀味，令其入口更加容易