福薈川菜 (Closed)

重慶烤魚近年在深圳同香港頗為流行，身邊有家人朋友都經常食，而由於我哋唔算嗜辣，雖然好鐘意食魚，但本身都比較少吃烤魚呢類麻辣食物。不過今日出開旺角，由旺角東火車站行出嚟見到呢間福薈川菜，店面望落幾大間，亦感覺幾正宗，即管入去試試。餐牌都幾多選擇，有麻辣米線、各式小炒同埋雞煲，不過一場嚟到，梗係試吓主打嘅烤魚。詢問店家有無小辣嘅選擇，最後揀咗蕃茄湯底重慶烤鯇魚。烤魚放於長方型器皿上，整盤魚用爐熱住，一直保持熱度。正宗重慶烤魚有醃、烤、燉三種烹煮技巧，可以逼出鮮魚香味，鍋上各種配料多到數唔晒，包括蕃茄、蓮藕、金菇、木耳、娃娃菜、豆卜、薯粉及大量香料。鯇魚多肉嫩滑，薯粉吸收湯底精華，含有蕃茄味嘅湯底同各類配菜均相當匹配，非常惹味。🛎️必試指數：8/10🔆