地點：旺角彌敦道
菜式：樓上cafe
餐牌：精選午餐有意粉，意大利飯同主菜揀，價錢由$138至$268不等。任何食品加$30可跟餐，即係包是日餐湯，餐包同$60以下飲品。
44
1
是日餐湯配餐包
先黎是日餐湯配餐包，今日係甘筍湯配蒜蓉包。甘筍湯用左隻肥杯裝住，好有家嘅感覺。個湯味道係濃濃天然甘筍味，打得好滑，甜度適中，面頭加上少少忌廉同香草。
伴有外脆內軟香口蒜蓉包每人兩片，味道鹹香可口。
北海道帆立貝海膽醬扁意粉 $178 另加一
北海道帆立貝海膽醬扁意粉用一隻大碟上枱，面頭有兩隻北海道帆立貝，整得好嫩口，啖啖肉。伴有貝柱粒、菇片、洋蔥粒。扁意粉色水呈橙色，好搶眼，味道都唔錯，帶微微海膽味，質感滑溜。面頭加上菜苗，碟邊灑滿香草。絕對係意日融合菜式。
日式原條鰻魚意大利飯 $178 另加一
日式原條鰻魚意大利飯賣相不錯，大大條原條鰻魚熱辣辣，味道唔錯，口感都彈牙。意大利飯有咬口，撈埋菇片同洋蔥粒，口感唔錯。面頭灑上木魚花、紫菜絲同蔥花。又一意日融合菜式。
兩杯飲品用木板上枱，伴有乾花小花束一支。
紅寶石巧克力草莓鮮奶 跟餐加$8
紅寶石巧克力草莓鮮奶係限定。白色鮮奶有士多啤梨醬墊底，中間再加上士多啤梨醬，同大量忌廉，最後灑上花瓣。忌廉份量滿瀉。飲落係香滑士多啤梨味鮮奶中帶甜甜地既忌廉，好飲，仲吸到士多啤梨肉。
手工黑芝麻 跟餐
手工黑芝麻係限定。色水呈黑白色，鮮奶加上黑芝麻醬，記得要撈好先好飲。味道唔甜。
意大利飯同意粉質素都唔錯。餐廳環境周圍放滿乾花植物，適合打卡。
