阿里郎熱狗棒 (Closed)

原來阿里朗熱狗開咗係旺角啦！地點仲非常方便，位於波鞋街附近，中旅社斜對面，好易搵。佢地嘅熱狗同傳統熱狗唔同㗎，好特別！今次我點咗「芝薯拉絲熱狗棒」「薯條鴛鴦芝腸熱狗棒」，外面有熱辣辣嘅薯條、薯粒包住熱狗腸及麵粉團，中間再夾咗厚厚的芝士心，食落去有拉絲㗎！口感好豐富有層次，外面薯條炸得非常脆口，裡面嘅薯蓉亦唔會太乾，做到外脆內軟效果。整體唔會太鹹，即使小朋友食都無問題，配合埋茄汁及黃芥辣醬，有傳統熱狗的味道又有新式的脆脆口感，正！所有熱狗棒都係即場整，所以非常熱辣辣，而且份量仲好多𠻹，食到好飽啊～佢地唔止得熱食，仲有韓式手工雪米糍(Omegi rice cake) (@$20)，原來係100%手造㗎！今次我地試咗士多啤梨🍓及水蜜桃味，雪米糍軟棉棉好似棉花糖質感，外皮好煙韌，厚度適中，餡料係由奶油打成的忌廉層加果醬，幾特別。奶油甜度剛剛好，忌廉打得好幼滑，食落口有雪糕質感。