DKLM Bar & Restaurant (Closed)

同諾士佛台一街之隔既呢間DK Bar，性價比好高，價錢相宜、嘢食好味、仲有波睇有酒飲有嘢玩，啱晒一大班朋友輕鬆一下。我同朋友一早收工就黎happy hour，人流一開始唔算多，不過愈夜愈多人愈有氣氛。首先當然叫返兩杯飲下先，咁岩去到做緊promo，like佢地facebook送枝啤酒，點會執輪。除此之外，呢度既happy hour係每日既四至九點，就算收工晏左都趕得切飲返兩杯叫返三兩個小食，而且小食特平兼大份，坊間少見。小食我地叫左烤薯條加雞泡魚乾。薯條好大好大份，我地兩個人食飲埋啤酒都半飽，配埋黑松露醬簡直一條接一條，食完返工既疲勞壓力盡消；而雞泡魚乾雖然烤過，不過唔算好硬，有𡁻頭但容易進食，亦係佐酒之選。食物選擇雖然唔多，不過作為一間bar都夠做了。先講下個Meat lover pizza，配料有唔同肉類，好似腸、煙肉等，加上芝士同鹹鹹甜甜既燒烤醬，幾好食，適合配返一d清少少既酒。而呢個牛肉粒都幾有驚喜，味道剛好，亦好軟稔，加上脆卜卜既蒜片叫人一口接一口。講真，呢度咁chill既環境同三五好友黎飲返杯確係唔錯，係尖沙咀亦好難搵到咁平靚正既地方，得閒上去坐下啦。