豚王 (新城市廣場) (Closed)

今日約左朋友在沙田睇戲，睇戲前例牌先醫肚，去到一樓搵食，本來想吃小籠包，但見到隔離有間「豚王」，想起幾個月前看過報導指豚王拉麵店日賣超過2000碗，是香港首三位日式拉麵餐館，於是便即刻改變主意轉吃拉麵。因為時間早，較少客人，店內空間頗大，木造的桌椅很有質感，尤其喜歡它的長椅，女士們將手袋放在身旁既方便又安心。拉麵選擇不多，只有幾款，我點了原味的「豚王」，朋友就選了較濃味的「黑王」，然後再按個人口味選擇不同的配料及麵，假如無乜要求又唔想麻煩的話，可以剔「廚師推薦」，交由廚師為你發辦，而我就當然唔會放棄選擇權啦。不一會，一碗豬骨味香濃的拉麵來到面前，湯頭較稠身，醬油味重，味道稍鹹，但伴著無味的椰菜和麵一起吃就恰到好處，有三數片肩肉部位的叉燒肉，肉質嫩滑亦唔嚡口，又沒有腩肉的肥膏，最合我口味，至於拉麵方面，我就選了硬身的幼麵，吃落有咬口，麵身有點介乎於廣東蛋麵與平日吃的拉麵之間，口感頗特別，難怪日賣過千碗，以後又多一間吃拉麵的好去處了。