五榖黃瓜湯，勁多湯渣，其實淨水可以的了。甜美湯汁充滿瓜味蘿蔔味蜜棗味，如果溫度再燙一點就更好飲一點。
菜甫炒蛋，色香味俱全使我不能自拔，真係要撈兩三碗飯先夠喉！青豆粟米紅蘿蔔添上甜味，跟菜甫咸味擦出火花，最後仲有爽嫩清甜芥蘭墊底呢。菜甫蛋勁足料真係好好味，必定要狂撈飯！絕對能夠送兩大碗飯都綽綽有餘。
羅漢齋湯麵，真係好齋！估唔到係白色四川拉麵，幸好嚥韌不太腍，頭頭有點淡加辣椒醬提味舒服許多。
西蘭花金菇肥牛，西蘭花有點腍不爽脆，肥牛像真度極高，以假亂真！味道質感近乎完美。
白飯，有飯焦而且微溫不熱，立即要求嬸嬸換過碗新鮮熱辣，天淵之別。
乾燒伊麵，足料好好味！最衰廚師忘記走芽菜，我又要續條挑走，挑乾淨後碟伊麵凍晒喇，食味急降！素肉雜菌伊麵，原本三分鐘可以食完，因為要花時間慢慢挑走所有芽菜，用上十幾分鐘消滅，阻住還枱給其他食客享用晚餐呢！。
金瓜湯，到底金瓜是什麼？南瓜湯？味道甜甜的，我不喜歡甜湯的。
麒麟卷，原來真身係榨菜肉絲腐皮，煎得十分香口可愛。榨菜咸咸脆卜卜搭著嚥韌素肉，水潤的餡配乾爽的皮，整體還可以。
發財好市，真的有蠔豉味喎！大量髮菜索味索汁，蠔豉外皮超級嚥韌，仿如有脆漿的炸蠔，美輪美奐。仲有生菜墊底，用生菜捲住髪菜蠔豉更加滋味。
羅漢齋伊麵，超足料多到鋪滿碟面，所有伊麵都被淹沒！雲耳、鮑魚菇、蘑菇、雞髀菇、豆卜、珍珠筍、菜芯、冬菇、紅蘿蔔，共冶一爐！終於食到香口嚥韌帶汁靚伊麵，完整無缺長啜長有！夾著不同配料品嚐格外醒神。
1
