北海道爐端 (Closed)

一向都鍾意食日本菜嘅我們，去到荔枝角一個大型商場D2，搜尋到一間北海道爐端燒餐廳。餐廳裝修以木為主，門口掛滿日式燈籠，非常耀眼，另外餐牌同埋特別推介嘅食物都可以喺門口先預覽，能切合客人嘅需要。餐牌上嘅食物選擇繁多。除此之外，餐廳牆上黑板都有是日嘅特別推介，首先我哋叫咗啲刺身同壽司等。刺身方面，點少得叫我最鍾意嘅三文魚同埋甜蝦刺身，兩者都非常新鮮，而且甜蝦好大隻，肉質爽口彈牙，唔使點Wasabi已經好鮮甜。壽司方面，海膽壽司賣相非常吸引，呈現鮮橙黃色，仲要係我至愛嘅日本北海道直送嘅海膽，正。見到黑板上嘅鰻魚蛋卷特別推介，所以叫咗一份試吓。一份有六片，中間GAP住好多鰻魚肉，食落去蛋卷好香滑，蛋味濃郁。串燒中嘅牛舌同埋白鱔串都燒得非常香口，牛舌質感爽口，白鱔串一啲都唔腥，仲要冇乜骨。除此之外，仲叫咗明太子雞翼、醬油燒鶴鶉蛋、荔枝煙肉卷、香酥雞軟骨同埋鹽燒三文魚骨等，同樣地每款食物都非常新鮮美味。