牛太 (Closed)

放工約左舊同事去荃新天地行街食飯，見開左間新嘅燒肉放題門口有大大張電子餐單，幾funny，可以任食100分鐘睇落又幾吸引，就入去試下。餐廳入面設計感都幾強，比人一種舒適自在嘅感覺，坐位都幾寬闊，張台又夠大張放野食！入座揀好放題套餐，侍應就會將套餐入落平板電腦，平板電腦會顯示你個套餐包嘅食物同用餐時間，可以隨時隨地落單，又唔怕漏單！我地2個女仔食唔到好多肉，所以就揀左$218放題餐，都有成39款選擇！首先試左唔同嘅肉，有牛肋肉、牛脊肉、豬腩肉、豬頸肉、雞腿肉、美國腸等等，我地encore左好多轉牛脊肉，燒完都好juciy又唔韌，牛味好濃好正！流心芝士奄列，面頭有糖霜，入口甜甜地，加埋芝士真係超級好味，沾埋茄汁食仲另有一番風味！鹽燒帆立貝同原隻魷魚仔，帆立貝燒完都唔會點縮水，好鮮甜！魷魚仔煙韌彈牙，越燒越香！金菇係日式蒜蓉牛油風味，蒜蓉同牛油配合得天衣無縫，金菇入口味濃又爽口！泡菜，少少辣，都幾醒胃！辛辣凍豆腐，好嫩滑，食落凍凍地幾過癮。