八王子居酒屋 (Closed)

晏晝喺度食嘢儲起兩張廿蚊Coupon，見未試過佢哋晚市就揾埋「日本狂迷」女朋友去試吓。嗰晚女朋友話想飲吓酒兼食d魚生寿司，問侍應有乜飛機貨，佢話有針魚、池魚、帆立貝及粒貝等等。最後都係叫咗最大路嘅池魚，然後叫咗帆立貝寿司、油甘魚寿司及三文魚籽寿司；再叫咗一個魷魚塩辛同芥辣八爪魚做餐前小食；最尾清酒就叫咗上次朋友生日會飲過嗰隻「瀨祭」！餐前小吃同正統居酒屋食嗰d無乜分別，如果無酒飲而淨食呢兩隻重口味小食都會覺得幾咸吓，宜家用嚟送酒就啱啱好！接住嚟嘅係池魚刺身，擺相幾好而食落又食得出好鮮味，係行貨d但真係唔錯吓。跟住再上埋嗰幾款寿司，件件都好新鮮，尤其油甘魚鮮甜爽口。三文魚籽比我有d驚喜，以前食過嗰d都係現成嘢好鬼咸，今次呢d好明顯係自家醃製嘅，不過味醂味重咗d而塩漬反而唔夠重，令味道偏甜咗d，同侍應反映過後希望下次有d改善。見個胃仲放得落野就叫多碗湯烏冬食吓，無乜特別，算淥得唔太差，個鰹魚湯做得幾好。