瀛舍 (Closed)

襯復活節假期天朗氣清去荃灣拜山, 拜完山喺荃灣行咗一陣街諗著早少少食埋飯先返屋企, 行經眾安街有人派紙日式放題五點食198. 見到話新開又有一段時間冇食過放題想食刺身就搭電梯上去開餐.餐廳位於十樓, 比附近唐樓高, 下午五點仲可以見到藍天白雲感覺好舒服.我地兩個人餐廳都安排張六人大卡位, 認真一流.五點鐘人客唔多, 餐廳非常闊落, 有自助熱盤炒烏冬炒飯, 罐裝飲品都有好多大牌子選擇, 最驚喜就係有酒店式自助甜品, 細細件精緻乾淨.自助清酒比較淡口好易飲.刺身有好多種, 叫咗甜蝦, 帶子, 油甘魚, 三文魚, 希靈魚, 八爪魚, 馬刀貝, 榮螺, 以及鮑片刺身. 刺身下面有碎冰保持低溫, 魚類刺身切得厚身, 食落有質感, 魚肉鮮甜. 貝類刺身爽口, 鮑片刺身有鮑片味, 甜蝦帶子肉質結實鮮甜.食完刺身叫咗壽司同火炙壽司, 黑松露三文魚壽司黑松露獨特幽香提升三文魚壽司味道, 左口魚邊火炙壽司魚油味香濃, 和牛火炙壽司牛味濃郁嫩滑.自助甜品朱古力方塊香濃軟滑, 士多啤梨大福切半賣相精緻.白汁焗蠔味道可以但焗蠔太細.黑松露燉蛋料多但燉蛋比較鞋.天婦羅虎蝦同南瓜新鮮熱辣.脆皮帶子酥帶子鮮甜薯蓉軟滑