係小隱隱於野感覺
主打串燒、牛湯泡飯、蠔燒飯團、綜合海鮮丼等，夜晚甚至有清酒
平時好少會喺度講裝潢陳設
不過今次真係覺得佢疫情期間有一個位好特別
室內放棄採用平常見到嘅白色隔板
反而用日式屏風代替
既不失日式風格，又唔會用白色咁普遍
即使疫情完咗，都可以繼續使用呢啲日式屏風
唔會浪費同製造垃圾，分隔更可以俾客人有私隱嘅感覺
除咗晚市，更有午市套餐
最平$68，最貴$138
主食丼飯以刺身、燒物為主，套餐有前菜小食或沙律
加上湯或汽水，價錢合理
小食係蝦春卷，餡料有鹹香
沙律醬配搭OK，但春卷皮唔脆
麵豉蝦湯就幾有水準，蝦味濃郁
並非得鹹味，有鮮甜味，暖笠笠
燒封門牛丼 $68 表面舖有一塊塊牛肉，一碗大概5塊
色澤唔太深，質感軟嫩，有輕微燒炙感
牛肉介乎生同熟之間，燒汁調味唔錯
可惜醬汁份量唔足以撈飯
醋飯粒粒分明，壽司醋調味上唔算好酸，珍珠米亦有添加芝麻點綴
牛油果雞扒溫泉玉子丼 $78 以雞扒、牛油果粒配溫泉蛋、玉子燒
雞扒連醬汁有啲黏稠感，鹹中略帶微甜味
似凍肉舖醃製雞肉
但牛油果粒粒就好新鮮
溫泉蛋同玉子燒充滿蛋香味，撈飯一流
