鳴虎石頭燒 (Closed)

之前返工經過紅磡見到啟岸巷子，見到呢個地方個裝修好有日本小巷既感覺，入面有唔少餐廳，今晚收工同男友黎搵下有咩好食。街頭見到鳴虎石頭燒，入面寬敞同木色做主調既整體感覺好舒適。自助一人火鍋價錢好平民，有4款湯底8款肉類，我地叫左壽喜燒同鰹魚昆布湯，肉類我地叫左一個美國牛胸腹同北海道黑豚肉眼，個鍋入面本身已經有幾款蔬菜，每人加$28仲可以享用埋自助沙律吧，呢個價錢黎講，自助吧食物既選擇都唔少，有各式各樣既丸類、蔬菜類同麵食。壽喜燒湯底味道香濃，唔會太鹹，牛胸腹油脂既分佈比較多，但食落都唔會好油膩。鰹魚昆布湯比壽喜燒味道清淡少少，但鰹魚味好濃，黑豚肉眼都好厚，唔會太肥同咬落唔會韌。另外再追加左4隻日本廣島蠔，肥美鮮甜！呢度仲有幾款串燒，我地都叫左個鰻魚串同免治雞肉棒試試，雞肉棒仲有配埋個生雞蛋沾住食，整體都好出色！最後當然唔少得啤一啤佢！