Daikiya Japanese Restaurant

放工同朋友聚一聚，今次我哋揀咗朋友最鍾意嘅「大喜屋」。地方又大又舒服，氣氛又唔錯。最緊要係可以任飲任食兩小時，每次嚟都好開心。菜色又新鮮，又有啲創意，經常推新嘢食，唔使擔心每次都係食同一款。


今次嚟就見到啲新嘢食，例如上湯虎蝦伊麵，蝦夠大隻。豉椒炒蜆，豉汁配椒香，辣辣哋好惹味，開胃之選。XO醬蒜蓉粉絲蒸蟶子皇，粉絲入味，吸收晒蟶子嘅鮮味，蒜蓉同XO醬配搭得幾好。油鹽焗大頭蝦，蝦肉都幾彈牙。薄切蜜柑鯛，鯛魚片切得好薄，配蜜柑，好酸好甜幾特別。紅燒鮑魚飯，鮑魚有嚼勁，一碗可以同朋友一齊分享。


另外，每次嚟都一定唔可以錯過嘅皇牌炸乳鴿，外皮酥脆。比目魚西京燒，係我嘅心頭好，魚肉嫩滑又甜甜地。海膽手卷，細細個唔使擔心食唔完。最後就係佢哋嘅金枕頭榴槤燒，榴槤香味濃郁，榴槤控一定要試。