五色刺身拼盤
一開始食嗰刺身先，有三文魚、帶子、赤蝦、希靈魚同北寄貝。新鮮冰凍，三文魚厚切肥美，北寄貝爽口鮮甜，正。
鮑汁扣海參併溏心靚鮑魚
嘩，第一個重點到啦！餐廳用料一啲都唔馬虎，採用澳洲鮑魚同南非海參，而且炆得夠晒腍，鮑魚彈牙，海參爽口軟滑，配埋嗰濃郁嘅鮑汁，真係無得彈。
紅燒花膠翅
湯底厚身，店員話嗰湯底係用鮮雞熬足3個鐘，唔怪得之咁香濃。花膠腍身，魚翅爽口，真係好正。
即炒奇妙雞煲
有大中小辣畀大家揀，我哋揀咗中辣，非常香口，雞件嫩滑，不過如果加多啲洋蔥、蒜頭同香草，會更加惹味。
火鍋湯底
6款湯底，任君選擇。有藥膳養身、重慶麻辣、杏汁豬肺、養生椰子雞、香濃豬骨同芫茜皮蛋。我哋揀咗藥膳養生鍋，一打開就有好香濃嘅藥材味，有紅棗、杞子、黨參等藥材，仲有大大舊豬骨，非常足料。
航母海鮮拼盤
拼盤有基圍蝦、沙白、生蠔、貴妃蚌同青口，非常新鮮。其中基圍蝦肉實味濃，沙白鮮甜無沙，生蠔肥美厚身。
安格斯肥牛
每人兩塊，雪花分佈平均，牛味濃郁，正。
話明係半放題套餐，大家可以任身超過30款火鍋配料，有美國肥牛、豬頸肉、基圍蝦、手打丸等。
未完呀，仲有是日糖水、自家製五花、冬瓜茶同汽水飲品，$268一位，真係食到攬住個肚走，好滿足。
