先黎個餐前小食，炸得啱啱好，外皮脆卜卜，松露味香到無朋友。
象拔蚌刺身 老闆介紹你加拿大象拔，唔洗水養，dadada lalala,知識型介紹，但我聽唔入耳。我驚我專心聽，會唔夠班餓鬼朋友搶。下次再去，我會專心咁聽番一次。
海胆仔排哂隊等你放入口。請唔好浪費機會，扮淑女分兩啖咬，人一世物一世，一定要成件入，包你唔會後悔。
牛肉刺身 當你放件牛肉入口，冷凍既溫度，令你味蕾感覺唔到D咩特別，但係一用小小力去咬，個D牛脂肪既香會滿瀉.試多件，加條洋蔥，點D柚子醋，都唔錯.不過我都係欣賞單純既牛味。
佛跳牆邊爐湯底 浮誇係練番黎，咩蒸海鮮粥底要滾先集到氣，成為一碗極上海鮮粥。呢個湯底半身上枱，已經飲得，新鮮鮑魚，螺片，花膠，冬菇，雞件，想難飲都難。飲哂頭啖湯再加清湯滾出個未來。太強喇！
韓牛 Oppa，你果然唔係得個樣，仲好有自己既味道。同中日美既味道，完全唔同。果然係太甜的後裔。
高潮蟹膏烏冬 呢個令到全枱人都出現高潮眼既烏冬。秘技係將蟹膏撈落烏冬，然後一吸一啜，就咁味蕾就到達咗高潮。
