潮福蒸氣石鍋 (Closed)

嚟潮福食蒸氣石鍋，見到有好幾款冷盤都好吸引，唔爭在試埋啲冷盤，睇下味道如何。口水鷄都夠辣夠入味，鷄肉滑度中上，冷度適中，當頭盤刺激下味蕾都幾唔錯。青瓜海哲 - 海哲算幾爽身，青瓜就普普通通，唔算太清甜，可以一試。食完冷盤，開始食主菜蒸氣石鍋。侍應一路幫忙放材料、計時、上菜，做足程序。清蒸就能食到海鮮嗰種鮮味嘅質素。由於材料全部都係生猛即蒸，所以非常新鮮。海蝦，蜆肉，聖子都很清甜而且鮮味十足，不用點醬油味道已經幾好，係食「食材」本身嘅條件。另外食了蒸餃子，稍嫌太濕，皮太淋，一夾即散，不過味道還可以。清蒸馬拉糕，這個不可不試。真係好食得難以形容。不會太甜，好鬆軟，熱辣辣非常有口感。肉蟹糯米飯就稍為失色。蟹中型size, 肉不多，味道一般。糯米飯太硬無味。最後食粥吸收了海鮮精華，當然好鮮甜。