其實打從名字開始就顯得不一樣...【亞古】，店員話我知係法語「Ragout」...本意為鍋物！幾有趣！
是晚放工後，大家都想打邊爐，聽同事介紹佢上次食過的【亞古鍋】是多麼高質，我見價錢偏中價位，而且又多好評就一於試試。
入到去覺得個view好靚，室內環境舒適，真係可以望到銅鑼灣夜景！
設計及隔局有別於一般既火鍋店！全場用黑色和暗紅色為主調配合掛燈和掛畫，餐廳本身好大，所以枱與枱之間好闊落，所以唔會覺得好迫同好吵鬧～打造出環境優雅格調，坐落仲好舒適！
店內更設有酒吧，有調酒師長駐，可以好relex同朋友傾計既地方。
環境就好合心意啦，但食物質素又如何呢？
調味料方面非常豐富，醬料放成九宮格而且望落好衛生，每個都好分明而且新鮮。
我地揀選左「招牌亞古鍋」，睇到有人話食完【亞古鍋】 嘅招牌鍋底番唔到轉頭就好想試試！
呢個鍋係用精選藥材做鍋底，入面估唔到會有「花膠、螺頭、瑤柱、紅棗、黑棗、杞子等」，再加鮮雞熬八小時而成。幾驚喜
先飲一啖，滲入濃濃既藥材湯味，非常滋味，每口盡是膠質，猶如燉湯般滋補養生。不愧係招牌湯底！
食材來源地來自唔同國家的出品，跟酒樓的火鍋有層次之分！因為呢度食材中的亮點莫過於在本地很難得的騸牯牛，所以我們點了
騸牯三寶，包括有「牛頸脊、邊抓、挽手」，到底咩叫「騸牯」？問左侍應哥哥，侍應哥哥好有禮貌咁解釋「騸牯」係指已閹割既牛，被閹割後既牛活動能力比較弱，因此脂肪比例都會高點，牛味亦較濃～講到咁點好似幾特別！期待啊！
黎到既時候真係覺得擺盤非常精緻，將牛頸脊包至玫瑰花形狀，下面亦好清晰分開左「挽手」同「邊抓」！除左牛頸脊外, 另外兩款既名都係第一次聽, 似乎其他地方很少有。
挽手肉比我既感覺更肥味，脂肪明顯比邊手多點；而邊手食落軟熟，牛味濃，兩種肉質味道截然不同！而「牛頸脊」肉質比較細緻，油花多，口感嫩滑，牛味又重！三樣都好好食！果然以罕有的騸牯牛（即閹牛）作招徠是對的！每天少量供應，好彩我都食得到！
除左牛之外其他配料及小食等逾百款，包括自家手打肉丸、餃子、各式海鮮及蔬菜等等，選擇應有盡有。我地亦叫左
「四合丸、豚肉韭菜餃、濟州豬肉、炸枝竹」！四合丸由4種肉混合而成「包括墨魚、蝦、豬、金腿茸」食落彈牙得黎又好有肉味，讚！豚肉韭菜餃韭菜往往比肉重味，但鹿兒島豚肉的油脂香肉味，相當突出，餃子皮十分薄，感到餡料滿滿！食得出保持到新鮮！好味的！
濟州豬肉都好香，不過比起招牌「騸牯」就當然冇咁出眾啦！平時唔太好豬肉既我, 食第一塊已經不停再吃，口感上比起一般的豬肉要來的軟嫩許多，咬起來帶有微微嚼勁，唔會有渣滓。
雞湯熬至奶白色，有黏稠應該係花膠既骨膠原，但冇黃油在面層，好似唔油膩呢！
炸枝竹比我想像既份量多，吸盡湯汁，再蘸少量辣椒醬，食多幾件都仲得！口感酥香，入口脆身而且食得多唔會感覺油膩！
兩個人始終食唔到太多野，最後就叫多個
唐生菜當清一清腸胃就完結呢個火鍋晚餐唐生菜洗得乾淨，顏色靚靚，幾爽口又夠甜
其實仲有好多款菜款想嘗試，包括吊籠、鵝肝墨魚丸！已經唸好下次幾個朋友再約食呢間【亞古鍋】，多人既時候可以品嘗更多款式配料！
高級的火鍋店來說食物的質素與價錢都算成正比！
作三五知己或商務飯局或情侶約會打個邊爐係可以傾計談心，呢間真係值得推介，因為好多打邊爐既地方都空間較逼而且吵鬧，呢度絕對冇呢個問題！夠闊落又高雅！服務質素都唔錯...照顧週到！
食完飯後在露台裡鳥瞰維港海景，吹吓風，又幾舒服呢！
