伍佰海鮮火鍋 (Closed)

同朋友聚舊最好打邊爐，一邊打一邊傾，越傾越有。今次黎到位於尖沙咀嘅伍佰海鮮火鍋。餐廳主打新鮮海鮮，坐低先點了一整條大紅魚！好新鮮，不過份量超級大，如果唔多人食記得問清楚份量，刺身彈牙鮮甜，仲可以放入火鍋燙一下，之後仲會將魚頭椒鹽油泡，脆卜卜又惹味，真係三重享受！湯底我地揀左冬蔭功同杏汁豬肺！冬蔭功係朋友強烈推介，話唔太辣唔太鹹，可以直接飲，果然好味。杏汁豬肺湯底呈奶白色，裡面有大大舊豬肺，一路滾聞到杏仁味好香，不過飲落就冇乜杏仁味。火鍋料方面，手切肥牛好有牛味，好好食。朋友話試過唔使叫最貴嗰款可以唔使叫，第二級已經夠好味。水餃大大粒好推介，仲有鵝腸好新鮮，必點。豬膶厚度適中，好粉好好味。整體來說係好高質素嘅火鍋餐廳。不過侍應好忙，有啲難叫人攞野。