鹽燒雞翼好出色，皮外脆，肉質嫩滑，鎖住啲肉汁，比起日本舖頭燒烤更加好食，好有心機慢慢燒，先可以有呢個效果。除了燒雞翼之外，燒紐西蘭羊鞍非常出色味道，醃得好入味，而且好腍，好少食羊鞍有入口即溶嘅感覺，應該廚房有一個做燒物特別出色嘅師傅，如果鍾意食燒物嘅人，一定唔可以錯過，加上任飲嘅清酒啤酒，慢慢食，都真係好嘆。川燒珍寶鮮蠔燒好新鮮，不過需要等候時間，可以一次過叫多幾隻，因為你食完之後會想再食。
鮑汁冬菇炆花膠，好入味，以為自己去咗酒樓，又係忍唔住嗌咗兩輪，花膠好腍，個汁好香味道一流！
黃金焗扇貝味道好好，有洋蔥忌廉蘑菇一齊焗，面頭焗到金黃色，再擺個蟹柳落去，味道配搭層次豐富，扇貝超新鮮。
陳皮蒸鮑魚隱隱約約的陳皮香味，鮑魚好腍，非常新鮮，肉質彈牙，味道豐富可口，好有驚喜。
胡椒大頭蝦係另一個驚喜，胡椒味重，非常惹味最重要嘅係個蝦好新鮮，肉質嫩滑，仲保留住啖胡椒嘅味道，食完縈繞在口中，又刺激又可口又香濃。
甜品部款式多樣，布甸雪糕雪米糍棉花糖，連朱古力噴泉都有，總有一款啱食，我哋人唔多，只係試咗幾款，全部都幾好食好高質。
餐牌上面竟然有酸菜魚，日式放題有酸菜魚都真係第一次見，但係見到好幾台都有叫，於是乎就叫咗一個嚟食。真係充滿驚喜。酸菜魚當然冇傳統嘅咁濃味，但係酸辣到剛剛好，加埋之前食咗都唔少嘅燒物，又有啲魚生，食呢個酸菜魚配合埋一齊，少少酸少少辣暖暖哋，真係好舒服。
馬來西亞極品榴槤, 真係好甜好新鮮。忍唔住encore 多次。真係食榴槤都食回本吖。
2個人食到捧住個肚走，最後埋單都只係6百幾真係好抵。
