最近喺尖沙咀ELEMENTS新開嘅越南菜Bistro Hoi An以會安古城為主題，主打一系列打卡又正宗嘅越南菜同特飲。餐廳樓高兩層，仲有露天廣場雅座，俾客人帶埋寵物嚟共進晚餐。
炭燒大蝦 $148
爽口彈牙嘅大蝦，係蝦頭有蝦膏嗰種。附上酸辣開胃嘅青辣椒汁，將帶炭火香嘅鮮味層次提升。
西貢牙車快 $98
牙車快喺香港唔係度度食到。手撕雞椰菜沙律配上蘋果、酸菜、豆卜、芝麻、烤花生，味道酸甜開胃，口感爽脆層次豐富。
河內生牛肉湯河 $95
美國生牛肉非常柔嫩，加上洋蔥、鵝芥、香蔥，更加香口惹味，配上滑溜湯河，飽肚又滿足。
薑茜烤原條鱸魚 $238
呢條鱸魚係必點推介！魚皮烤得半香脆，但魚肉非常嫩滑。加埋花生、生菜、蜜柚、檬粉撈埋一齊食，其實係一道超豐富嘅主菜。
焦糖爆谷香蕉 $72 呢個甜品絕對係個人私心推薦！佢用咗比利時焦糖餅雪糕、紅桑子配搭香蕉，酸甜果香同甜蜜焦糖味平衡得啱啱好，連一向唔好甜品嘅我都好快食晒！
15
HOI AN CÔNG CHÚA (HOI AN PRINCESS) $78 夢幻粉紅色名叫「會安公主」嘅mocktail當然係女生打卡首選。荔枝、青檸汁、接骨木花糖漿 加 玫瑰花氣泡茶，清新兼花香撲鼻。
DALAT GARDEN $118 淡黃色嘅Dakar Garden係用上趙氏女大叻花香氈酒、接骨木花利口酒、檸檬汁、蘋果汁 同 薰衣草糖漿嘅cocktail，酒味唔算濃，偏花香易入口。
試過先知呢度有姿勢有實際，絕對唔係淨係打卡only。餐點味道好之餘，份量都好多。靜靜雞話你知：除咗七彩燈籠之外，店內仲有一張四人枱自成一角，喺個拱形洞穴裏面，係一個比較秘密嘅打卡位！
1
1
