銀芽

Open Now

Now Closed

最近中環The L Place地下開咗間茶記，裝潢新派，行粉紅色少女風格，仲有漫畫壁畫打卡。早餐/午餐/下午茶/晚餐設有唔同菜式，食物款式多樣化，常餐、鐵板、鍋物、小炒等，價格親民，地點方便，店員服務態度親民友善，整體感覺良好，喺附近返工嘅朋友仔又有多個選擇啦。港式鐵板餐有豬牛雞，牛柳煎至七成熟，上枱時咋咋聲，香噴噴，薯條炸至酥脆可口，搭配蒜蓉汁更惹味。巴基斯坦皇室咖喱牛肋肉煲熱辣辣，咖喱味香濃唔辣，撈飯一流，牛肋肉煮至軟腍，仲有薯仔同三色椒，份量都唔細，但唔覺唔覺就清晒，適合多人分享嘅一款菜式。家常六品料理夜晚先有，包含燉湯、前菜、茶碗蒸、主食、米飯同養身茶，部份食物可自由搭配，份量十足，一個女仔未必食得晒，營養均衡，住家飯味道，好味得嚟又打卡able。哈密瓜海底椰南北杏燉排骨清甜入味、茶碗蒸蛋香味出，淨係前菜已經令人刮目相看。講到主食方面，滑蛋粟米龍利球大大塊，外皮脆且薄，肉質嫩，味道偏清淡，無雪藏味，老少咸宜。千島沙拉骨啖啖肉，最緊要係個靈魂醬汁，越食越上癮、蟹皇漁村孖寶蒸肉餅超厚身，肉質紮實，味道鮮甜，好滿足、唔想淨係食肉嘅可以叫埋個蒜茸炒菜心，整體性價比高，會回訪。