正品小館 (Closed)

見到佐敦新開咗一間新嘅食肆，點都要去試一試啦。 初初以為呢一間只係普通嘅小菜館，入到去先發現呢度有好多好正既地道嘢食，尤其係啲海鮮類小炒。 裝修富有人情味，餐牌有海鮮小炒，abcd餐，係一間好香港式嘅小菜餐館。 黎到必然要試一試佢嘅杏汁花膠湯同埋杏汁白肺湯， 真係唔係度度都飲到。 杏仁攪得夠碎，一絲絲杏仁粉口感， 有好香好香嘅杏仁味。再加上佢足料嘅花膠同埋白肺， 值回票價。 第一次食呢種凍食鹽焗馬友， 真係非常美味。 馬友魚肉結實，入口富有口感， 加上佢係鹽焗，鮮未出曬嚟， 點埋佢辣椒豉油更加惹味， 食到停唔到口。 蝦醬通菜炒一大碟， 都只係48蚊，真係去邊度搵。 炒得夠鑊氣夠惹味，送飯一流。 點咗一隻奄仔蟹，雖然唔係話太大隻，但過下口癮已經足夠。 奄仔蟹入面好多膏，味道鮮甜。 豉椒炒聖子又係必點推介， 真係好抵食，大大碟又足料又惹味， 而且聖子肉質結實，夠彈牙爽口，配料亦夠多，必點之選呀。 唔夠飽當然要食埋佢呢度嘅蠔仔肉碎泡飯， 蠔仔份量多到離譜。 而且蠔仔洗得乾淨一啲沙都冇， 個鮮甜味出曬嚟。加上芫茜味，非常地道可靠。