呢度都幾大，比一般快餐店裝修得靚、企理，而且d staff都幾有禮貌，抵讚！
暫時d枱都仲有透明膠板相隔。
menu款式多，價格實惠。【食肉獸巨人扒餐】真誇張，包左雞脾、厚切豬、熱狗腸、煙肉、薯條都係158，其實兩個女仔share都足夠有突啦。
選擇困難症嘅朋友可以參考呢張對精選推介，將推介項目一覽無遺，好似炒飯/焗飯/螺絲粉/意大利飯/墨魚麵/湯飯/闊條麵都係$68-88。
比較豐富嘅仲有鰻魚飯/西冷牛扒/龍蝦伊麵/燒春雞/加拿大豬鞍等，應有盡有，價錢係$98-168。
主餐牌仲會有小食、炸物、甜品添，通通都好吸引
我地就決定點多少少share食，勁滿足！點晚餐可以用$28升級套餐，就會包左餐湯同凍飲，餐湯揀左南瓜湯，都ok嘅，甜甜地，唔會太稀身
凍飲揀左凍檸茶，唔洗少甜都可以接受。
凱撒沙律煙三文魚 $68：沙律菜新鮮，簡單用沙律菜調味，煙三文魚質素都唔錯，唔係一味死鹹，伴碟兩片麵包幾好食呢，香脆架
我點左呢份好似幾正嘅原個蕃茄濃湯安格斯肥牛湯烏冬，價錢係$68，以呢個質素我覺得完全物有所值。首先擺盤都幾認真，staff上枱時又有略略講下建議食法，好細心；食到中途，又會問客人洗唔洗「加火」
金色壺入面係濃湯，夠熱辣辣嘅，食到中途再加都ok。
湯底入面有原個蕃茄，非常juicy，按照店員建議，逐片肥牛落鍋，咁就唔洗怕火力一下子變得太弱。
牛肉肉質都比想像中來得好，除咗唔會太薄，亦都唔會太肥膩，入口仲幾滑添，真係抵食
我配左烏冬，可以加入脆米同湯底一齊食，更加香口
紐西蘭西冷牛扒配薯條 $138：可以揀5/7成熟；燒汁/黑椒汁，塊牛扒都幾大塊架，厚身，難得煎到要求嘅熟成度，外面焦香，裡頭唔會變左全熟！牛扒有肉香，完全唔鞋，反而仲幾軟腍。
伴碟薯條就ok啦。
我地入來時都冇睇過其他食評同介紹，都係事後先知咁多人讚。咁老實講，成餐飯咁嘅質素，我覺得係超出預期，如果我住呢頭，都一定會經常來。
