食物方面：
北京片皮鴨
呢個係招牌菜，的確做得唔錯。口感同賣相都幾可亂真。醬汁同配料都跟足，味道同口感都好豐富，完全係誠意之作～～
素食點心 (燒賣、牛肉球、珍珠雞)
點心水準超乎預期。燒賣食落有咬口，牛肉球嘅質感模仿得幾好，彈牙。珍珠雞入邊有很多冬菇及栗子，超級香又好食。仲即叫即制。
素食串燒配秘製沙嗲醬
素食串燒，真系有驚喜！用牛蒡同猴頭菇做嘅"肉丸"，口感居然做到好似真肉丸咁彈牙，完全唔覺係食緊素。最正係個秘制沙嗲醬，香濃惹味，帶少少花生香，但又唔會太膩，同串燒出奇地夾。
重點想讚嘅係個甜品！
紐約芝士蛋糕
呢個真心有驚喜！ 雖然冇蛋，但係食落芝士味濃郁，完全唔似傳統齋舖啲甜品。最正係藍莓醬，唔係死甜嗰種，食到有粒粒藍莓果肉，酸酸地，正好平衡返芝士蛋糕嘅濃郁感，搭得非常好。我覺得可以特登過嚟食呢個芝士蛋糕。
環境服務：
地方乾淨光猛，坐得幾舒服。服務員態度幾好。
總結：
整體味道好，製作認真。餐牌清楚列明該食物有沒有奶，非常細心。
無論係素食者想換下口味，定係想帶食肉朋友試下素食，呢度都係一個好選擇。
