鬼滷 (Closed)

同事介紹銅鑼灣有間新派潮州菜館叫鬼滷，有係鬼咁好食嘅滷水食物，講到咁好食，今晚就同老公過嚟試吓，菜館是樓上舖，裝潢以紅色作主調，環境幽雅，又係一個打咭好地方。滷水鵝片、鵝腸、慢煮鹽香雞：上枱時店先在碟下點一小火，以保持碟上食物溫度冇咁快凍，熱住食係好味啲！鵝片切得均勻一致，紋理細緻，而且滷得入味，鵝香滿溢，吃罷齒頰留鵝香。鵝腸乾淨冇異味，爽脆有咬口，滷水比一般滷水味道較淡，不死鹹，滷汁晶瑩，愈嚼愈香。鹹香雞因為係慢煮，所以雞肉特別嫩滑入味。蘭王蛋蠔餅：蠔餅煎炸得好酥脆，用上蘭王蛋蛋味特別香濃，蠔仔亦脹卜卜好飽滿，加上木魚碎和兩碟醬汁，令味道提升不少。椒鹽普寧豆腐：普寧炸豆腐是廣東潮汕最傳統菜之一，普寧豆腐由於使用優質的水源製作，豆味更香濃，口感外酥內嫩，配上自家製韭菜鹽水，可解油膩之餘，風味更獨特。黑松露蔥油拌麵：麵條軟硬適中，加上蔥油和黑松露醬，一入口黑松露的味道濃郁且味道層次豐富，越食越滋味！