Lime Soda青檸疏打（$28）＆Jaljeera印式疏打（$28）
朋友點左青檸疏打，酸酸地好開胃。自己想試下新野，點左印式疏打，好特別呀！飲落係鹹酸辣味㗎，飲到有薄荷，孜然，辣椒，黑胡椒等味，哈哈，奇怪啲但我覺得好飲喎，侍應姐姐問我使唔使加sweet，個人覺得甜可能唔襯就拒絕左了。
Chicken wings雞翼（$78）
餐牌上寫係Buffalo，仲以為會係辣㗎添，又無辣喎，食到好大陣香料味同BBQ醬味，點下個蜜糖芥末醬又幾好味。
Mexican Quesadillas墨西哥油炸玉米餅（$98）
又係比餐牌呃左，哈哈，油炸玉米餅，我以為係硬身嘅Taco類野。
玉米餅附上的醬料，白色係芝士酸忌廉，好滑同杰身。紅色係雜菜茄醬，酸酸地帶甜椒味。
烤餅入面係香料雞肉同芝士，本身調味不重，點埋個醬料就好好味，個人覺得兩樣都加晒最好，入面包住一大塊芝士好正呀～
Italian Meatball Pizza Large意式肉丸披薩（$148）
一上枱就有強烈的香草味撲鼻而來，熱辣辣即烤㗎，正呀正呀～
1
超澎湃嘅瀑布芝士！芝士控表示相當滿意！！醬料係茄汁底，一鹹一酸本來就係完美配搭，加上薄身香脆的餅底好味到無得彈呀～肉丸係羊肉丸加入大量香料搓成，滿滿的羊肉香同香草香，個人覺得好好味噃。
原來門外有指示，入去前都無留意添。
整體來說覺得食物很對胃，香料同芝士都係個人愛好，好好味呀～
