和牛燒肉一郎 (寶漢大廈) (Closed)

聽到和牛燒肉一郎喺銅鑼灣開咗新分店，所以就約埋朋友專登過嚟試一試新嘅分店，睇吓佢嘅質素會唔會係keep到同佐敦嗰間一樣。銅鑼灣呢一間分店會比較細，但係地方都會係寬敞嘅😁首先繞場一周先🤣有凍櫃專門係拎飲品同埋佢哋自家製嘅甜品。好驚喜佢哋係呢一間分店有得玩自己擠雪糕，當然仲有一個櫃係放咗唔同嘅日本甜品🥰我哋經過一輪考慮之後最後咪叫咗B餐，一嚟都係上咗一個舟盛合先😁有齊牛、雞、豬、海鮮、蔬菜等等。我叫咗日本雞胸肉切片，好嫩滑😍仲有我好鍾意食嘅壼漬牛肋肉😚呢一款薄切牛肋肉都好好食，仲配上溫泉蛋添，燒好嘅牛肉沾上溫泉蛋嘅蛋液，非常濃郁好味。仲有其他唔同部位嘅牛肉都好好食，另外我哋叫咗生菜嚟整生菜包，記得叫埋佢哋嘅泡菜，因為夾埋一齊食真係一流！炸物方面試咗炸雞、炸蠔，兩樣都係出乎意料之外咁好食，個炸皮唔會太厚，熱辣辣咁送上嚟，真係抗拒唔到呢個誘惑！食飽飽當然要滿足埋甜品胃啦！擠左杯雪糕獨食，仲要落咗朱古力醬，香濃嘅牛乳味配上朱古力醬，為今日嘅晚餐畫上完美句號🥰📍 和牛燒肉一郎銅鑼灣波斯富街24-30號寶漢大廈2樓