斗記點心專門店 (Closed)

今日兩個人來到旺角想食點心，經過豉油街見到有間斗記，仲有焦香煲仔飯，於是入去試下。 店內人唔算多可以上四人位，我哋叫咗斗記蝦餃皇，安蝦鹹水角，豉汁鳳爪排骨飯同一籠小籠包。 過咗十分鐘，斗記蝦餃皇首先從上，果然係招牌嘅蝦餃，皮薄餡多，而且個皮唔會穿，入面好多新鮮蝦肉，爽口彈牙，啲肉汁喺塊皮度滲出嚟。 之後小籠包送上，一籠有四個，都只係16蚊，小籠包入面有好多汁，味道比較甜。 之後煲仔豉汁鳳爪排骨飯送上，鳳爪排骨飯就食得多。煲仔嘅鳳爪排骨飯就第一次食。啲鳳爪同排骨係一般茶樓嘅水準。主要係想講啲飯，啲飯有啲焦香，配上啲豉油汁，同啲肉汁滲咗落去，個飯先係精華。 最後仲有個鹹水角，鹹水角睇落應該係啱啱炸出嚟，個皮唔係成個硬掘掘，而係外脆內軟，個皮有少少麻薯嘅煙靭口感。