韓牛韓式燒烤 (Closed)

有時出去食飯唔想洗太多錢，放題都係一個好選擇。咁岩又旺角做交匯點，最正路嘅選擇都係個堆「韓燒放題/日式放題/雞煲/打邊爐」。所以最後我地揀咗創興嘅韓牛・韓式烤肉放題。其實久遠嘅之前都有食過，印象不俗，因此橫掂放題，梗係揀番有保證嘅選擇。每人百零蚊，任食時間個半鐘，時間可以話係相當充裕。最重要放題唔洗落點餐紙，非常自助嘅小食區，咁就唔怕漏單又或者食物份量減料嘅情況，想食幾多就拎幾多，最岩我地呢種自由不羈嘅顧客。韓牛佈局入口正前方就可以一覽無遺嘅L型自助形小食區，個人覺得食物種類繁多，不論你係甜品怪定食肉獸，都絕對可以滿足各種喜好嘅人。由於最近無乜點食肉類，所以除咗一開始食咗少少蔬菜類之後，我就開始暴風吸入各式各樣嘅肉類，除咗豬肉、雞肉、鴨胸肉、刺身，個人最為專注係牛肉上，呢款醃制嘅牛肉雖然無說明係咩醃料，但個人覺得醃得入味，而且肉身不算十分厚，非常快熟透，推薦可以拎啲洋蔥，燒香夾埋牛肉一齊食，更加唔錯。總結整晚，除咗胃部飽福之外，感覺都十分富足。與記憶之中嘅韓牛表現如一，食物種類多，就連Re-Fill嘅速度都好快，十分抵讚。所以話，真自助放題最好！