一樂日本料理 (Closed)

星期四做野做到悶悶地，最想係同幾個同事勁刷一餐，放題係最好既選擇。上網搵到呢間就去試吓。佢地可以用微信下單好方便，我地成班師奶都係鍾意一頁頁紙逐頁睇逐個剔。先黎兩款蝦，一個蒜泥，一個鹽花燒海蝦串，各有風味，最緊要爽口，個蒜汁唔咸，剛剛好 。同事叫左炸榴槤同牛奶，個榴槤丸一咬落去，D榴槤汁就爆出黎，好香唔係好甜，好食。香口既食物唔好俾佢停，每人整番兩隻芝麻雞翼，大大隻有口感。再黎多份全辛柚子醬燒雞中翼，好LIKE呢款，佢話辣，其實只係少少，加埋柚子醬既酸甜同香味，然後中間D肉仍然嫩滑，要推介。最後食埋甜品，一口蛋糕係必食，呢間仲有唔同既酥餅，每樣一件，個糖炒脆粒好少見，又酥又有一粒粒糖既口感。之後食埋雪條，再整杯movenpick 士多啤利味雪糕，香甜滑漏，甜到入心。加48蚊可以任食即開生蠔，一入門口就見到個生蠔櫃，今次同其他同事一齊共同進退無叫，下次同屋企人去一定要食。