見今晚得閒，特登搵咗間餐廳去放鬆一下。
餐廳位於寶勒巷，都算幾易搵。
室內燈光唔係光燦燦咁，都幾有氣氛同情調。
基於我比較懶，直接問店員有咩推介就算。
今晚食咗:
加拿大生蠔
凱撒沙律伴煙三文魚（轉雞）
帶子牛肝菌意大利飯
西班牙黑毛豬架
Fruit Punch
Perfect Match
加拿大生蠔 ($40)
生蠔平時男友唔喜歡食，話以前試過好腥臭。
但今次竟然佢話好好食，好juicy。
聽講貨源同出面嘅星級酒店一樣，但價錢就爭幾倍喇。
(隔離枱個外國人成日嚟食蠔，
話藍寶石好好食，但唔係成日有貨)
凱撒沙律伴煙三文魚（轉雞）($88)
On diet中嘅我為咗呃吓個胃，所以叫咗個沙律食。
煙三文魚感覺上比較無咁健康，所以問店員轉咗雞。
值得一讚係啲菜好新鮮，完全唔霉，
而且沙律醬係另上，自己鐘意落幾多都得，
唔似某啲餐廳咁預先撈好，好肥。
帶子牛肝菌意大利飯 ($168)
唔好睇佢碟少少，其實兩個人啱啱好。
帶子有兩大粒，微微煎過，食落仲有好多汁。
意大利飯軟硬適中有口感。
西班牙黑毛豬架 ($268)
食豬架最怕整得太熟，咁會超嚡口兼無味。
今次豬架整得唔錯，肥瘦適中，充滿肉汁。
下面的配菜索哂豬架嘅肉汁，好惹味。
Perfect Match,Fruit Punch ($75@,有7折)
鬆一鬆當然要飲返杯好野，
但我同男朋友都唔太好酒，所以都係叫無酒精好啲。
兩杯相比下，我喜歡Perfect Match多啲，
酸酸甜甜醒神啲嘛。
