自從稻香係紅磡廣場開將後，係依區既所有茶客好似大執位咁，稻香日日高朋滿座，但其他酒樓，包括囍滿庭、海洋皇宮、潮洲公館、金御、翠苑等等，都比以前冷清左，間中 lunch 都唔洗等位。對於我地返工既當然好啦，時間緊迫麻 ~
今日同客食飯，又唔想等位，就黎依度坐吓傾吓計，嘆杯茶先。約一時四十分，果然完全唔洗等，一到即坐，good ~ 夠晒靜最高興，可以坐得舒服又唔嘈，非常開心 ~
鳳爪排骨飯，係蒜香排骨，啖啖肉，半肥瘦，肉香，味道唔錯。飯一粒粒又乾身，完全無濕淋淋既感覺，有趙口，係無咩飯香啫，撈埋甜豉油，正 ﹗好味 ﹗以酒樓既排骨飯質數黎講，算係中上喇。雖然我個客話唔好食。
沙嗲雞串，正常味道，雞炸得還可以啦，無變雞乾，都仲有少許肉汗。沙嗲醬，食落已經知道盡晒力去模仿正宗既味道，甜甜地，唔夠香囉。我比較喜歡港式辣沙嗲，因勁愛食辣野。
脆炸牛腩，好有冒險精神叫黎試一試，唔知食緊咩，好唔掂，好似啖啖都食緊牛脂肪咁，炸得好香口，但係味道好蘇，雖然配以喼汁點，但無咩幫助。創意係有，但質量麻麻，可能係選料方面要下啲功夫，試吓用靚牛腩，先炆後炸，因該效果更好。做法類似香酥鴨或香酥羊咁。
白灼菜心，都算好嫰口，新鮮。都係嗰句，我比較麻煩，只食最鮮嫰部份，差不多係頭 1/3 到 2/3 部份啦。但間中都會成棵食晒既，如果真係成棵都勁嫰，或者係菜苗囉，仲有係好肚餓囉。
海蜇手撕雞，最後面嗰碟。手撕雞絕對係隔夜嗅雞味，唔新鮮。整碟既味道唔酸唔辣，清淡無味，做唔到開胃前菜既效果。海蜇都算爽口，但真係無味 .....
蟹籽燒賣，一夾就散、爛晒、散筲筲，唔實淨，蝦、豬肉、肥豬肉包得鬆散，好差。味道都可以，肥肉份量可接受，全無蟹籽味。結論係一試無防，大眾化口味。
四寶雞札，雞柳、魚肚、火腿、芋頭。雞柳入味又滑溜、魚肚軟棉棉又索滿精華、火腿咸香。但依個時候仲用芋頭？﹗雖然我都唔會食芋頭，但依家真係唔啱季節啦，生晒水，又肉酸，變通吓用住其他食材先啦。見其他酒樓會用吓豬肚呀、豬潤呀、珍珠筍呀、冬菇呀、大菌呀、等等，效果同味道都好好 ~
兩個人食咁多野，埋單成三舊水，都幾誇張。我個客都只係食左少少菜、海蜇手撕雞、排骨飯，剩返全部我一個食晒。食得太多野，依兩三年加埋重左 30 磅，要積極減肥喇 ~
