上海粗炒同薺菜肉絲炒年糕都吵得乾身而且冇乜油，食落去冇咁罪惡。上海粗炒唔會好甜，好怕其他地方食到好甜嘅上海粗炒。薺菜好香，令到個炒年糕特別好食。
雞絲粉皮做得唔錯，佢個粉皮係厚身少少同埋比較彈牙嘅，唔會一pat pat。另外佢個麻醬嘅份量啱啱好，有時出面其他地方太多麻醬會搞到個雞絲粉皮濕納納。
小籠包最有驚喜，皮夠薄入面嘅肉又好有鮮味，做得非常好。
松鼠桂魚$208真心抵食，落咗好多松子仁同蝦仁，條魚仲要起咗骨所以基本上都係啖啖肉嘅。
酸辣湯$58一位$108一鍋梗係叫一鍋啦，都可以裝到六碗，份量都算多。
最後想讚吓呢度啲侍應服務非常好又有禮貌實在非常難得。
