御前大江戶日式料理 (Closed)

朋友仔特別推薦，仲話訂咗幾次都訂唔到位，相信會好好味，今日終於有機會試下啦！今日同朋友一行四人嚟食。樓下等 lift 已經勁排長龍（好彩佢有好多部 lift），點知到餐廳門口都仲要排隊。夠鐘入座就好快嘅，只係唔明點解明明訂咗位都要排隊，更加唔明無訂枱嘅人點解仲會有心機繼續等。好啦坐低咗，係用 ipad 點餐，不過我呢啲懶人梗係將呢個任務交俾同枱嘅朋友啦！隨便睇過，係多選擇嘅，有刺身有熱食有燒烤嘢。上菜時有介紹返每款食物要點樣煮，煮幾耐。不過我覺得個侍應就唔係咁好禮貌，講得好快，4個人都無人聽到佢講咩。唔緊要啦，我哋自己睇番枱卡嘅介紹 okay 啦。我估計每枱客都有贈品，我哋嘅係刺身拼盤，大大盤幾吸引。而咁多樣入面最吸引係個蟹蓋，燒烤時上面個蛋黃郁下郁下好得意。另外比較令人驚喜嘅係佢嘅飲品 & 沙律 & 甜品 bar！飲品有cider，汽水，清熱飲品等。甜品有雪米糍，雪糕，雪條，酒店buffet果啲蛋糕。沙律我無興趣，所以無留意。整體嚟講，我覺得性價比係高嘅，但係排隊太耐。如果佢開分店，我會考慮再來！