今次應該係第4次黎食，之前係爸媽兩個人行街既時候經過行入去食覺得唔錯就帶埋我地食
我地6:00pm左右就到左 個時冇咩人 點菜既時候店員都好熱心咁推薦D野食比我地
最後我地都叫左好多...真係食到棒住個肚返屋企
海鮮豆腐羹 清清地D蝦都好爽 我地7個人 店員叫我地叫碗大既 結果都有7碗大半
牛三食 四選三，冇叫牛肚 最好食係牛筋跟住到牛脷 兩樣都好香牛味，牛筋好似係牛筋凍黎 牛肉(牛"月展")就真係麻麻地..好乾....
咖哩羊腩 真係唔錯!! 唔算好辣 但係咖哩冇搶哂羊既味，送飯/薄餅正!!
＊＊＊紅燒豆腐鍋＊＊＊
大推薦!!! 牛尾稔而入味，連D配菜好似冬菇、筍等等都入哂味! 全晚最好食既小菜!!
松子魚 賣相好靚...但係條桂花魚可能因為新年存貨既關係，淨食係冇咩味....真係靠個汁...不過個汁唔錯
如果佢連條魚都係新鮮既話，絕對值$168 (最貴係佢...)
奶油津白 純粹係想叫碟菜食 可能其他野都好濃味 我食唔到咩味 = =
值得一讚既地方係冇牙都食得....:)
羊肉鍋貼..其實我地牛羊肉既餡餅(牛x2 羊x5) 同鍋貼(每樣1碟5件) 都有叫，不過冇影相
牛同羊既味道真係兩樣野黎...羊>>>>>>牛
在座都有人唔食羊.....比左少少佢食，佢都話有D羶...
下次不妨可以試下先食牛再食羊，就會知道分別
不過唔理係食羊定牛，鍋貼定餡餅，千其唔好一大啖咬落去，會爆汁的
同埋要趁熱食啊
另外，我個人prefer煎既多過水餃 始終係好多香料 搭好清既野都係怪怪地..不過驚熱氣既話都可以叫水餃食既，唔同風味:)
另外仲叫左一碗白飯同薄餅同6,7 罐汽水
結果我地6大1細 埋單連加一 好似係$1047 都算抵食
下次一定再黎:)
