Oishi Shabu

喺openrice買左早鳥優惠，$175一個人，琴日同朋友請半日假5點半去食2小時放題火鍋任食。

琴日掛住食無影相，我地2個人，火鍋可以一人一個小鍋，我地叫左個麻辣湯同埋蟲草花松茸。前者用嚟淥肉，丸，菇之類，後者清淡湯底專淥菜同海鮮。麻辣湯底淥完我無再用其他調味，淨係加些小蒜茸䓤莞荽。蟲草花松茸湯底我都無加調味，可以食到海鮮嘅鮮甜。佢湯底加湯係加水，不過我地加左幾次都覺得仲係ok嘅。

講完湯底講食物，大部分食物係用手機掃QR code用手機落單。琴日5點半係唔多人食，啲嘢上得好快。飲品，調味料，火鍋啲菜呀，菇呀之類出面自己拎。火鍋肉類入座嗰陣送左一碟牛舌，落單我地淨係叫左極上肥牛同羊肩肉，肥牛ok但羊好肥。其他都有叫啲丸，炸魚皮同海鮮。老實講，我無諗過2百幾蚊嘅放題加火鍋有海鮮叫，對我嚟講係驚喜之選。我地叫左蝦，青口，蠔同埋蜆，見到仲有花膠，不過我地無興趣所以無叫。青口蠔同蜆好鮮甜，我地有再encore。鍾意食海鮮嘅朋友絕對可以一試。

放題都係正常嘢，刺身有三文魚，八爪魚，希靈魚，帶子，甜蝦，北寄貝，赤貝，仲有一兩款唔記得。唔算大件同厚切，但又放題又火鍋，咁嘅size對我地嚟講啱啱好，唔夠食再叫。其他壽司熟食都正常。黃金墨魚餅朋友話唔好食，但燒物類唔錯，我地叫左燒茄子串燒雞軟骨同燒波蘿。食榴槤嘅朋友可以叫榴槤炸彈，我同朋友都覺得好食，但甜品個榴槤甘露除左面頭嘅榴槤，杯嘢麻麻地，同埋好多珍珠。甜品仲叫左珍珠伯爵茶奶凍，好濃茶味，可以一試。

整體而言，如果期望非常高質嘅食物就梗係同幾百蚊一餐嘅無得比，但又放題又火鍋嚟講，質素唔低同埋CP值非常高，又一次過滿足晒2個願望。係唯一要小心嘅係，我地入座嗰陣嘟左優惠個QR code, 但入座後職員唔知，又走嚟問我地係純火鍋定要埋放題，埋單都係無扣返優惠俾左嘅350蚊，所以自己要留意下。原價218計埋加一240左右，依家用openrice優惠175一位再加返原價加一，埋單2人總供要俾44，除番開一位200左右非常抵食。