甘味讚岐手打烏冬 (Closed)

難得同同事好友食晚餐，嚟咗皇室堡呢間甘味食日本野，餐牌花多眼亂，最後還是簡單啲吃set，我叫咗個芝士豬扒便當（ $128 ），有刺身（三文魚、鯛魚、玻璃蝦同埋蟹柳），每款兩件，而且都新鮮！又有四件壽司（三文魚、馬刀貝、墨魚片、玉子），仲有蟹子沙律，有我選擇嘅芝士豬扒一件，仲有一碗讚岐手打烏冬！仲有一碗麵豉湯！一個set有六樣野，係超級豐富，而且只係$128 ，我覺得相當之抵！ ！除咗刺身同壽司冇令我失望之外，蟹子沙律份量好多，可以中和一下。而芝士豬扒好大件，裏面有濃郁嘅芝士，好吸引囉！至於手打烏冬都好彈牙！我諗係我咁大食嘅人先食得晒！同事叫咗個軟殼蟹天婦羅便當（$108），除咗個豬扒變成軟殼蟹其他完全一樣，軟殼蟹都炸得唔錯，成隻蟹型喺度，又唔會油膩。另外仲有個小食「燒八爪魚餅」（ $38 ），相比之下份量就「的骰」啲，屬於煙韌質地，味道尚可，見到有啲八爪魚碎喺裏面，真材實料。