煜焙軒 (Closed)

行了半日山，最後都由深井搭返車出市區打邊爐，今次試下呢間煜焙軒，就在旺角維景對面，因為店面有大大隻招牌套餐，啱晒二人份量。而且出面就係巴士站，食完搭車返屋企好方便！我地5:30到，食早輪。$508的套餐A包了養生花膠雞燉翅鍋及一盤手切本地肥牛。上枱一刻有驚喜，因為花膠雞鍋好大鍋，足有大半隻雞係鍋入面，仲有冬瓜、蔬菜、蟲草花及金華火腿片等，好足料。湯底好濃郁又清甜，店員提我地一定要飲湯先，然後再加湯打邊爐。個湯真係好好飲，食到真材實翅，雞肉嫩滑啖啖肉，好滿足！唔打邊爐真接當花膠雞咁食亦無不可！但我地飲完湯食完雞仲有好多湯剩，所以加湯就可以淥牛肉！額外點了蔬菜盤、墨魚滑及大蜆等，份量都好足亦新鮮。手切牛肉味濃，入品又夠肥美，直接落湯唔使點醬一樣夠味！肥豬造型的墨魚滑質感爽滑，十分彈牙，仲有粒粒蟹子，食落帶點卜卜脆，好有咬口！仲有大蜆，隻隻都肥美又無沙，好鮮甜。蔬菜盤份量又多，食菜都食得好滿足。因為鍋底濃郁，所以全程感覺似係用老火湯打邊爐。作為一間唔係任食的火鍋，煜焙軒算係交足了功課，價錢唔貴，份量足，加上位置方便，所以有不少捧場客。