心裡有素 (Closed)

是日經過廣華醫院附近，見有人排隊，睇下咩黎啦，原來係素食自助餐，假期午餐都係88蚊，咁平試下佢先。分午市、下午茶、晚市，每個時段用餐時間不同，我同朋友黎食午市就有75分鐘。門口先付款，店員再安排入座，店不大，大概有40個位左右。店員示意入座就可以取食物，主要有炸物、涼盤、熱盤同沙律吧。第一轉就梗係咩都攞啲試下，炸菇好香脆，涼瓜入味唔苦，蓮藕爽甜，三色水蛋超嫩滑一定要試。麻醬青瓜冷麵好清新，沙律吧有生菜、粟米、蕃茄、青瓜、蜜瓜同西瓜，醬汁就只有麻醬，感覺熱盤冷盤都唔錯喎。食食下店員會拎啲新出品出黎問食客要唔要，呢個素咕嚕肉幾得意，咬落好香花生同合桃味，唔知用咩做呢？仲有呢碗拌麵，賣相好靚喎，拌的是甜醬不辣的。跟住試下湯先，冬瓜合桃湯，素湯都可以好鮮甜，正。仲有小米粥都唔錯，好綿滑。飲品有凍檸檬意米水、紅棗羅漢果茶，熱飲有玄米茶，三樣都試過唔錯，凍飲微甜，熱茶係濃濃的米味，好得意，同平時飲到嘅玄米茶唔同。仲有紫米飯、炒粉麵、蕃薯、粟米、茶葉蛋等，食物款式都幾多呀，熱盤同炸物源源不絕咁出唔使爭。呢個價錢真係好抵食，唔怪得排隊等位。