極品煮意 鷄煲.烤魚.火煱 (Closed)

平時喺葵興返開工，放左工都慣左去尖沙咀或者荃灣食飯，都冇諗過喺附近食，甘啱有同事同我講係葵涌廣場附近，有間好抵食嘅雞煲火鍋，所以星期五晚就去試吓啦！我哋七點半去到，當時都未滿座，所以我哋兩個人，都可以霸四個位，方便擺嘢食。除咗打邊爐之外，出邊都擺咗好多小食，最好食就係雞翼，你睇幾大隻。其實除咗雞煲之外，佢都可以揀烤魚或者普通火鍋，而我哋由於唔想食辣嘅關係，就揀咗個清清地嘅蟲草花椰子雞煲。雞煲到咗，都幾多蟲草花同雞，味道清清地，飲落都幾舒服。食晒d雞後，我哋就出去揀咗好多配料，配料好多選擇，最鍾意就係有咁多菜，平時打邊爐好少會叫咁多菜，今次仲要係任夾添，佢其中一個雪櫃仲寫明新鮮蔬菜，分別有娃娃菜同唐生菜，擺得都幾精緻。除咗自己夾配料，其實仲可以任點肥牛、鯇魚骨腩、豬肉片等。另外，佢哋嘅飲品係超多選擇，只係飲品，都已經放五至六個雪櫃。而另外一個驚喜，就係即食麵烏冬嘅選擇，全部都未拆袋，感覺好衛生乾淨及大方。最後，我哋每人食咗兩個雪糕先走，老實講味道唔算非常驚喜，但係用呢個價錢來說，是超級物有所值。