宴．鐡板燒 (亨環‧天后)

Open Now

Now Closed

喺網上搜羅咗一啲Omakase嘅資料，見到一間樓上鋪好特別，佢係鐵板燒混合日式料理，今日抽咗啲時間嚟品嚐一個特別嘅午餐。午餐頭盤係日式刺身，好新鮮。之後係「日本北海道甜粟米」配「靜岡溫室蕃茄」作為前菜，呢味係冷盤，北海道粟米超級香甜，令人印象深刻。接着有油甘魚壽司同埋鯛魚壽司，師傅喺你面前即叫即做，好新鮮，好好味。跟住就係熱盤，喺鐵板燒之前，師傅會先俾你睇睇佢用嘅食材，今次有帶子、大蝦、和牛同埋鵝肝。燒帶子配合三文魚子同埋青醬一齊食，好鮮甜、好惹味。燒大蝦，製作方法好特別，先取出蝦頭入邊嘅蝦膏，造成醬汁，再放返上蝦肉上面，蝦膏非常濃味，非常推介。香煎鵝肝配多士，鵝肝好香滑，外脆內軟，入口即溶，配合多士，將多餘嘅油分吸走，鵝肝入口唔會好油膩。而多士吸左鵝肝嘅油，亦都非常香脆好味。牛扒有兩種煮法，第一種：香煎厚切牛扒，肉質鮮嫩，食到牛肉嘅鮮味。第二種：薄切牛扒，夾住蔥花一齊煎，非常香嘅蔥味，帶出牛肉嘅鮮味，非常欣賞呢個煮法，真係一試難忘。結尾有麵豉湯同埋炒飯，炒飯加入咗好多櫻花蝦，脆卜卜，用料十足，好香好好味。兩個人都食到好飽好飽。午市套餐價錢合理，食物質素好高，性價比高，值得一試。