花月宮 (Closed)

FD冬至要OT，所以早少少同她過冬。哩間火鍋店裝修得唔錯，每一個位置都好啱打卡。嘢食揀咗之後，會有調料九宮格送上，估唔到小料種類都咁豐富，啱晒大部分食客啲口味。可樂係食火鍋必叫，今次係隻裝可樂，都有少少驚喜。泰北冬陰公原隻澳洲龍蝦海鮮鍋底，哩個鍋底好勁，以為只得一隻澳龍，原來仲搭配咗好多其他海鮮，有海蝦，墨魚仔同青口，湯底仲有好多木耳同平菇。好鐘意食火鍋前先飲碗湯，湯底飲落好濃郁，酸酸辣辣好開胃，真係落足料黎煮。澳龍長過成隻巴掌，食落好鮮甜彈牙，半隻食完已經好滿足。新鮮牛胸爽，好少係出面火鍋店食到。牛胸爽睇落好似肥膏咁，微微燙左已經可以食，食落勁爽口，同埋一D都唔肥膩，一碟完全唔夠喉。爽口鮮蝦雲吞（四粒），雲吞好大一粒，鮮蝦同肉餡balance得幾好，食落好Q彈。脆皮芝士腸，一份有10條，哩個真係FD啲最愛，次次食火鍋必叫。新鮮豬粉腸，哩個都係好少見，始終處理粉腸好麻煩，唔係家家火鍋店都鐘意賣。粉腸處理得好乾淨，嗦晒冬陰公湯底味道，食落好好味。哩間火鍋真係驚喜，最抵食啲係泰北冬陰公原只澳洲龍蝦海鮮鍋底，成個鍋底食完已經6-7分飽，之後一定要試試佢個椰子雞湯底才得！