火五越式牛肉粉專門店 (華生樓) (Closed)

呢間火五坐落太子站附近，未入餐廳先睇menu，價錢方面真係幾吸引，於是入去試試。侍應好熱情咁招待我地，仲話呢度既牛肉粉麵係招牌菜添。我地點左個火五火車頭牛肉河。 有牛腩扎肉牛肉片，份量好多，真抵食。香茅豬頸肉油香飯都唔錯，好大份之餘，豬頸肉整得好香脆，大量既青瓜絲紅蘿蔔絲為呢碗飯增添色彩。至於法式咖哩牛肋配越式炸蝦春卷，咖哩好香，牛肋好林身，炸蝦春卷炸得好香口，配埋咖哩汁咁食又幾得意。呢味手作扎肉米紙卷，食落感覺非常清新健康，大量蔬菜同粉絲被扎肉同米紙包住，口感層次豐富。嘢飲方面，我地叫左鹹檸梳打同越南椰汁冰。鹹檸好足料，飲落好解渴。至於椰汁冰， 原來佢係用椰子水再加埋椰皇既椰肉製成，感覺非常清新健康。